नेपाल २४३ रनले विजयी, पारस एक्लैको १६१ रन

नेदरल्याण्ड्स र मेरिलिबोन क्रिकेट क्लबसंगको त्रिकोणात्मक क्रिकेट खेल्न इंग्ल्याण्डमा रहेको नेपालले ह्याम्पशायर हग्स क्लबसँगको पहिलो अभ्यास खेल २४३ रनले विजय भएको छ।

शनिबार राति सकिएको खेलमा ३६३ रनको लक्ष पछ्याएको ह्याम्पसायरलाई ३७ ओभरमा ११९ रनमा अलआउट गर्दै नेपालले फराकिलो जित हात पारेको हो।

नेपालका ललितसिंह राजवंशीले ५ विकेट लिए । त्यस्तै सन्दीप लामिछाने र दिपेन्द्रसिंह ऐरीले दुई दुई विकेट लिए । १० ओभर बलिङ गरेका ललितले ४ मेडन राख्दै ३४ रन खर्चेर ५ विकेट लिए । यस्तै ८ ओभरमा सन्दिपले १८ रन खर्चिए भने दिपेन्द्रले ५ ओभर १ बलमा २० रन दिंदै २ विकेट लिए । करण केसीको नाममा एक विकेट रह्यो ।

टस जितेर पहिले ब्याटिङ गरेको नेपालले कप्तान पारस खड्काको १ सय ६१ रनको मद्दतमा ५० ओभरमा सबै विकेट गुमाएर ३ सय ६२ रन बनाएको थियो । १ सय ६ बलमा १ सय ६१ रन बनाउने क्रममा पारसले ७ छक्का र १९ चौका प्रहार गरेका थिए । यस्तै, रोहितकुमार पौडेलले ४४, दिपेन्द्र सिंह ऐरीले ३७ र आरिफ शेखले २७ रन बनाएपछि नेपालले ठूलो योगफल तयार पारेको थियोे । यस्तै, करण केसीले १८, सन्दिप लामिछाने र ललित भण्डारीले १६–१६ तथा शरद भेषावकरले १४ रन बनाए ।

नेपालले दोस्रो अभ्यास खेल जुलाई २३ मा सेन्ट क्रससँग ट्वेन्टी –ट्वेन्टी खेल्नेछ । यस्तै नेपालले जुलाई २५ मा इष्ट लन्डन ११ विरुद्ध ५० ओभरको र जुलाई २६ मा इष्ट लण्डन शार्कसँग ट्वेन्टी –ट्वेन्टी खेल खेल्नेछ । चार अभ्यास खेलपछि नेपालले क्रिकेटको मक्का मानिने इंग्ल्यान्डको लर्डसमा जुलाई अन्तिम साता हुने त्रिकोणात्मक टी–ट्वेन्टी सिरिज खेल्ने छ । नेपाल, नेदरल्याण्ड्स र मेरिलिबोन क्रिकेट क्लबबीच लर्डस्मा हुने त्रिकोणात्मक शृंखला जुलाई २९ तारिखमा हुनेछ ।