क्रिकेटमा नियम परिवर्तन हुँदै, अब क्रिकेटमा पनि पेनाल्टी

अन्तर्राष्ट्रिय क्रिकेट काउन्सिल (आईसीसी)ले क्रिकेटलाई रोमाञ्चक र अनुशासित बनाउने उद्देश्यले सेप्टेम्बर २८ देखि विभिन्न नियम परिवर्तन गर्न लागेको जनाएको छ । मैदानभित्र खेलाडीको असामान्य र उत्तेजक गतिविधि रोक्न क्रिकेट खेलको नियम बनाउँदै आएको मेरिलिबोन क्रिकेट क्लब (एमसीसी)ले नयाँ नियम ल्याएको हो। ती नियमलाई आईसीसीले बिहीबारदेखि लागू गर्दैछ।

खेलाडीको व्यवहार नियन्त्रणका लागि एमसीसीले अलगअलग सजायको व्यवस्था गरेको छ। चार श्रेणीमा विभाजित सजायको पहिलो बुँदामा बढी अपिल गर्ने र अम्पायरको निर्णयमा असन्तुष्ट हुने खेलाडीलाई सबैभन्दा पहिले चेतावनी दिने गरिन्छ। यसका बाबजुद पनि उसले फेरि त्यही गल्ती दोहोर्‍याएमा विपक्षी खेलाडीले पेनाल्टी पाउनेछ। पेनाल्टीमा विपक्षी टोलीले पाँच रन पाउनुका साथै अम्पायरले खेलाडीलाई मैदानबाहिर पनि पठाउन सक्नेछन्।

यसैगरी कुनै खेलाडीले अम्पायरलाई डर देखाउने र धम्क्याउने गरेमा वा विपक्षी खेलाडीलाई यस्तो गरेमा पनि विपक्षी टोलीले पेनाल्टीबापत पाँच रन प्राप्त गर्नेछ। साथै क्रिकेटको फम्र्याटअनुसार केही ओभरसम्मका लागि मैदानबाहिर पठाउन सकिनेछ। यस्तो कसुरमा अम्पायरले पाँच रन पेनाल्टीका साथै पूरै खेल खेल्नबाट वञ्चित पनि गराउन सक्नेछन्।

एमसीसीले ब्याटको आकारका बारेमा पनि नयाँ नियम ल्याएको छ। केही वर्षदेखि ब्याटको साइजलाई लिएर विभिन्न टीकाटिप्पणी भएपछि एमसीसीले एकरूपता ल्याउन नयाँ नियम परिमार्जन गरेको हो। क्रिस गेल, महेन्द्रसिंह धोनीलगायतका क्रिकेटरले मोटो र बढी वजनको ब्याट प्रयोग गर्ने गरेको भन्दै प्रश्न उठेपछि एमसीसीले नयाँ नियम लागू गरेको हो।

नयाँ नियमअनुसार ब्याटको चौडाइ एक सय आठ एमएम, गहिराइ ६७ एमएम र ऐज ४० एमएमको हुनेछ। एमसीसीले ब्याट निर्माता कम्पनी, संघ र आईसीसीका विभिन्न निकायसँग समन्वय गरेर ब्याटको नयाँ मापदण्ड निर्धारण गरेको हो।

एमसीसीको नयाँ नियमअनुसार रन आउटको नियममा पनि परिवर्तन गरिएको छ। पहिले रन आउटबाट बच्न ब्याट्सम्यानको कुनै पनि शरीरको भाग अथवा ब्याटले क्रिजको लाइन पार गरेर भुइँमा छुनुपथ्र्यो। क्रिज पार गरेमा पनि शरीरको भाग र ब्याट हावामा भएमा ब्याट्सम्यान रन आउट हुन्थ्यो। तर, यो नियमलाई एमसीसीले परिवर्तन गरेको छ। ब्याट्सम्यानको शरीरको कुनै पनि भाग र ब्याटले क्रिज लाइन हावामै पार गरे पनि अब रन आउटबाट बच्नेछ।

Leave a Reply

Your email address will not be published. Required fields are marked *